Эбола вирусы — адам ағзасына ауыр әсер ететін, өте қауіпті жұқпалы вирустық ауру. Ол геморрагиялық қызбаны тудырады және дер кезінде медициналық көмек көрсетілмесе, өлімге әкелуі мүмкін. Ауру алғаш рет 1976 жылы Африкада тіркелген.

Эбола вирусы қалай таралады?

Эбола вирусы адамға:

жұқтырған адамның қаны, сілекейі, тері бөлінділері, құсығы, нәжісі және басқа биологиялық сұйықтықтары арқылы;
вирус жұққан заттармен байланыс кезінде;
жабайы жануарлардан (жеміс жарқанаттары, маймылдар және т.б.) жұғуы мүмкін.

Вирус ауа арқылы таралмайды. Ауру белгілері жоқ адам инфекцияны таратпайды.

Негізгі белгілері

Эбола вирусының белгілері әдетте жұқтырғаннан кейін 2–21 күн ішінде пайда болады:

дене қызуының көтерілуі;
әлсіздік;
бас ауруы;
бұлшықет ауруы;
тамақ ауруы;
құсу;
іш өту;
іштің ауыруы;
кей жағдайда ішкі және сыртқы қан кету.
Алдын алу жолдары

Эбола вирусынан сақтану үшін:

қолды сабынмен жиі жуу;
науқас адаммен жақын байланыстан аулақ болу;
биологиялық сұйықтықтармен жанасудан сақтану;
жеке қорғаныс құралдарын пайдалану;
жабайы жануарлармен байланысқа түспеу;
медициналық ұйымдардың санитарлық талаптарын сақтау қажет.

Ауру белгілері байқалған жағдайда дереу дәрігерге қаралу қажет. Ерте анықтау мен уақтылы көмек өмірді сақтап қалуға мүмкіндік береді.